Vatikan dövlətində Azərbaycanın dövlət müstəqilliyini bərpa etməsinin 20-ci ildönümünə həsr olunmuş mərasim

2011-ci il noyabrın 29-da Vatikan Dövlətində Azərbaycan Respublikasının dövlət müstəqilliyinin bərpa edilməsinin 20-ci ildönümünə həsr olunmuş təntənəli mərasim keçirilib. Azərbaycanın birinci xanımı, Heydər Əliyev Fondunun prezidenti Mehriban Əliyeva və Vatikanın mədəniyyət naziri, kardinal Can-Franko Ravazi mərasimdə iştirak edib.

Tədbir çərçivəsində qədim misgərlik nümunələrinin, musiqi alətlərinin, xalçaların, Bakıda ənənəvi olaraq keçirilən “Qız qalası” festivalında təqdim edilən əsərlərin nümayiş olunduğu sərgi təşkil olunub. Sərgidə, həmçinin Azərbaycan Milli Elmlər Akademiyasının Əlyazmalar İnstitutunun kolleksiyasında mühafizə olunan və UNESCO-nun “Dünya Yaddaşı” Proqramına daxil edilmiş üç orta əsr əlyazma əsəri nümayiş etdirilib.

Tədbirdə “Azərbaycan” nəşrinin italyan versiyasının təqdimatı olub.

Mərasimdə Azərbaycan incəsənət ustaları konsert proqramı ilə çıxış ediblər. Konsertdən sonra qonaqlara Azərbaycan mətbəxinin nümunələri təqdim olunub. Sonda tədbir iştirakçılarına Heydər Əliyev Fondunun Azərbaycana aid müxtəlif nəşrləri hədiyyə olunub.