04.jpg
16 aprel 2020

COVID-19-a qarşı mübarizə tədbirləri ilə əlaqədar əsas bacarıqları gücləndirmək üçün REACT-C19 layihəsinə start verilir

Ümumdünya Səhiyyə Təşkilatının təşəbbüsü, Heydər Əliyev Fondu, İcbari Tibbi Sığorta üzrə Dövlət Agentliyi, Tibbi Ərazi Bölmələrini İdarəetmə Birliyi (TƏBİB) və Səhiyyə Nazirliyinin dəstəyi ilə Azərbaycanın regionlardakı xəstəxanalarında COVID-19-a qarşı mübarizə tədbirləri ilə əlaqədar əsas bacarıqları gücləndirmək üçün REACT-C19 layihəsinə start verilir. Layihədə Türkiyədə çalışan 19 azərbaycanlı həkim iştirak edəcək. Layihənin məqsədi hazırda COVID-19-a yoluxmuş xəstələrin müalicəsi üçün bölgələrdəki seçilmiş xəstəxanalarda COVID-19-la bağlı əsas bacarıqları sürətlə inkişaf etdirməkdir.


Bunu TƏBİB-in İdarə Heyətinin sədri Ramin Bayramlı aprelin 16-da keçirilən mətbuat konfransında deyib.


R.Bayramlı, həmçinin bildirib: "Layihə çərçivəsində bölgələrdə yerləşən xəstəxanalarda çeşidləmə "tiraj" sisteminin tətbiqi, infeksiyaların qarşısının alınması və nəzarət, xəstəlik hallarının idarə olunması, reanimasiya sistemlərinin qurulması, xəstəxanalardakı heyətə lazımi sistemlərin yaradılması və uzunmüddətli saxlanılması ilə bağlı sürətli təlimlər keçmək, bu xəstəxanalarda yeni təlim keçmiş kadrları dəstəkləmək üçün onlayn, mobil və ya rəqəmsal texnologiyalar yaratmaq nəzərdə tutulur. Türkiyədən gəlmiş azərbaycanlı həkimlərdən formalaşdırılmış dörd heyətin hər birində infeksiyanın qarşısının alınması və nəzarət, tiraj, yoluxma hallarının idarə olunması və Ağır Kəskin Tənəffüs Sindromu (SARS) üzrə mütəxəssislər təmsil olunur.


Ümumdünya Səhiyyə Təşkilatının (ÜST) Azərbaycandakı nümayəndəliyinin rəhbəri Hande Harmancı bildirib ki, həmin mütəxəssislər Türkiyənin seçilmiş universitetlərində təlimlər keçib, həmin sahələr üzrə praktiki təcrübələr əldə edib və müvafiq təlimat alıblar. Bununla yanaşı, onlar dəyişikliklərin idarə olunması və stresslə mübarizə ilə bağlı da biliklərə yiyələniblər. Həkimlər və tibb bacıları öz sahələri üzrə mütəxəssis olduqlarından, təlimlərin məqsədi onların bilik və bacarıqlarını yeniləmək və standartlaşdırmaq, onları əlavə innovativ vasitələrlə təmin etmək olub.


Xəstəxana hazırlıq heyətləri seçilmiş xəstəxanaların direktorları və baş həkimlərinin rəhbərliyi altında hər xəstəxanada iki həftə ərzində təlim keçəcəklər. Hər komanda növbəti xəstəxanada fəaliyyətə başlamazdan öncə cari xəstəxanadakı heyətə sistemi idarəetmə məsuliyyətini təhvil verəcək.


Layihə çərçivəsində tibb işçiləri üçün onlayn platforma da istifadəyə veriləcək və bu platforma vasitəsilə onlar təlimlər və təqdimatlar, mentorlardan videodərslər və statistik məlumatlar əldə edə biləcəklər".


Heydər Əliyev Fondunun Beynəlxalq əlaqələr departamentinin direktoru, Milli Məclisin deputatı Soltan Məmmədov Fondun səhiyyənin inkişafına hər zaman dəstək verdiyini bildirib. O, Fondun ölkəmizdə COVID-19-la mübarizə tədbirlərinə verdiyi töhfələrdən bəhs edib.


Layihənin sahə üzrə koordinatoru Hamza Zeytinoğlu layihə çərçivəsində ilk olaraq 16 xəstəxana seçildiyini diqqətə çatdırıb. H.Zeytinoğlu bildirib ki, Bakıdakı 4 xəstəxana ilə başlayan layihə rayonlarda davam edəcək. O, Azərbaycanın koronavirusa ən az zərərlə qalib gələcəyinə ümid etdiyini bildirib.


FOTO