Tələbə Qəbulu üzrə Dövlət Komissiyasından (TQDK) bildirmişlər ki, Heydər Əliyev Fondu və Litva Respublikasının Azərbaycandakı səfirliyi arasında bağlanmış müqaviləyə əsasən, 2010/2011-ci tədris ili üçün Litvanın təhsil müəssisələrində azərbaycanlı gənclərin dövlət hesabına təhsil alması üçün müsabiqə elan edilir.
Bakalavr təhsili üzrə müsabiqədə 2010/2011-ci tədris ili üçün Azərbaycan Respublikasının ali məktəblərinə müvafiq ixtisas qrupu üzrə qəbul imtahanında iştirak etmiş və ümumi balı 300-dən az olmayan abituriyentlər iştirak edə bilərlər. I, II və III ixtisas qrupuna aid olan ixtisasların müsabiqəsində iştirak etmək üçün abituriyentlərin ingilis dili fənnindən nisbi balı 80-dən az olmamalıdır. IV ixtisas qrupuna aid olan ixtisasların müsabiqəsində iştirak etmək üçün abituriyentlərin ingilis dili fənni üzrə attestat qiyməti “5” olmalıdır. Müsabiqədə, həmçinin bu il ölkəmizin ali təhsil müəssisələrinin I kursunu bitirmiş tələbələr də iştirak edə bilərlər. Magistratura pilləsi üzrə müsabiqədə iştirak etmək hüququna 2010/2011-ci tədris ili üçün respublikamızın ali məktəblərinin magistraturasına qəbul imtahanlarında müsabiqə şərtlərini ödəmiş, bununla yanaşı, imtahanın birinci mərhələsində ingilis dili üzrə testdən topladığı bal 20-dən az olmayan bakalavrlar malikdirlər.
Müsabiqədə müvəffəqiyyət qazananların Litvada təhsil alması dövlət hesabına maliyyələşdirilir. Yataqxana və digər xərclər tələbələr tərəfindən ödənilməlidir. Müsabiqədə iştirak etmək istəyənlər iyulun 26-dan avqustun 10-dək TQDK-da yaradılmış Sənəd Qəbulu Komissiyasında qeydiyyatdan keçməlidirlər (Ünvan: akademik Həsən Əliyev küçəsi, 17).