Pakistanın Lahor şəhərindəki kimsəsizlər evində humanitar tədbir keçirilib

Azərbaycanın birinci xanımı, Heydər Əliyev Fondunun prezidenti Mehriban Əliyevanın təşəbbüsü və dəstəyi ilə Pakistanın Pəncab əyalətinin Lahor şəhərindəki “Edhi Homes” kimsəsizlər evində humanitar tədbir keçirilib.

Tədbirdə bu ölkənin gömrük və vergi naziri Muctaba Şuca-ur-Rəhman, Sülh və Diplomatik Tədqiqatlar İnstitutunun direktoru Məhəmməd Asif Nur, “Edhi Homes” kimsəsizlər evinin rəhbərliyi, burada məskunlaşan uşaqlar və media nümayəndələri iştirak ediblər.

Tədbirdə çıxış edən səfir Daşqın Şikarov hazırda Azərbaycan ilə Pakistan arasında münasibətlərin ən yüksək səviyyədə olduğunu diqqətə çatdırıb, bu baxımdan Prezident İlham Əliyevin rolunu xüsusi vurğulayıb. Diplomat Mehriban Əliyevanın təşəbbüsü və dəstəyi ilə Pakistanın bütün əyalətlərində səhiyyə, təhsil sahələrində silsilə humanitar yardımlar proqramının icra olunduğunu qeyd edib. O, Mehriban Əliyevanın, xüsusilə, kimsəsiz uşaqlara hər zaman diqqət və qayğı göstərdiyini bildirib.

Pakistanın gömrük və vergi naziri Muctaba Şuca-ur-Rəhman tədbir iştirakçılarına ölkələrimiz arasında əlaqələrin tarixindən, Azərbaycanın Pakistan xalqına xüsusi sevgisindən bəhs edib. O, uşaqlara Azərbaycan ilə bağlı öyrənməyi və ölkəmizi sevməyi tövsiyə edib. Nazir bu cür tədbirlərin Pakistanın bütün əyalətlərində hər il keçirilməsinə və ən çətin günlərdə ölkəsinin yanında olmasına görə Azərbaycan xalqına, dövlətinə, Prezident İlham Əliyevə, Mehriban Əliyevaya öz xalqı adından dərin minnətdarlığını bildirib. Mehriban Əliyevanın təşəbbüsü və dəstəyi ilə Pakistanın bütün əyalətlərində həyata keçirilən belə humanitar və sosial tədbirlərin iki ölkə arasında mövcud olan qardaşlıq münasibətlərinin inkişafına xüsusi töhfə verdiyi vurğulanıb.

Sülh və Diplomatik Tədqiqatlar İnstitutunun direktoru Məhəmməd Asif Nur çıxışında Heydər Əliyev Fondu tərəfindən Pakistanın bütün bölgələrində həyata keçirilmiş humanitar tədbirlər haqqında məlumat verib, bu qəbildən olan silsilə tədbirlərin ölkəsi üçün əhəmiyyətini xüsusilə qeyd edib. O, həmçinin Ramazan ayında Pakistanın bütün əyalətlərində kimsəsiz uşaqlar və ahıllar üçün iftar süfrələrinin təşkil edildiyini, Lakki Marvat bölgəsində, zəlzələdən zərər çəkmiş Bəlucistan əyalətində, Lahor, İslamabad, Ravalpindi və Fayzalabad şəhərlərində Qurban bayramı münasibətilə yüzlərlə iribuynuzlu heyvanın qurban kəsilərək əhalinin kasıb təbəqələrinə paylandığını vurğulayıb, bütün bunlara görə Azərbaycan xalqına və dövlətinə dərin təşəkkürünü bildirib.

Sonra səfir Daşqın Şikarov və nazir Muctaba Şuca-ur-Rəhman kimsəsiz uşaqlara Heydər Əliyev Fondu adından təhsil ləvazimatları və müxtəlif hədiyyələr paylayıb.

X X X

Tədbirin sonunda səfir Daşqın Şikarov və nazir Muctaba Şuca-ur-Rəhman media nümayəndələrinə müsahibələr veriblər.

Nazir müsahibəsində 2012-2015-ci illərdə Mehriban Əliyevanın təşəbbüsü ilə Pakistanda səhiyyə, təhsil sahələrində bir sıra humanitar layihələrin icra edildiyini qeyd edib. O bildirib ki, “Edhi Homes” kimsəsizlər evlərində, “Akbar Care” Serebral İflic İnstitutunda, Lakki Marvat Uşaq və Qadın, Peşavar “Kulsum İnternational” klinikalarında “Hepatit B” virusuna qarşı peyvəndlər və müayinələr, habelə açıq ürək əməliyyatları aparılıb, Saif Fonduna maddi yardımlar edilib. Eyni zamanda, Həmzə xeyriyyə fonduna xüsusi qanköçürmə laboratoriyası ilə təchiz olunmuş “Suzuki” markalı təcili tibbi yardım avtomobili və minlərlə qan köçürmə paketi hədiyyə edilib. Xayber göz klinikasının yeni blokunun və gözləmə otaqlarının inşasına, İslamabadda Talassemiya Mərkəzinin tikintisinə maliyyə və texniki yardımlar olunub. Nazir 2014-cü ildə Mehriban Əliyevanın təşəbbüsü və dəstəyi ilə Dera İsmail Xan bölgəsində “Heydər Əliyev su təchizatı”, 2015-ci ildə isə Qucarxanda “20 Yanvar şəhidləri su təchizatı” layihələrinin icra olunduğunu xatırladıb, bunun nəticəsində ərazidə yaşayan on minlərlə sakinin içməli su ilə təmin olunduğunu bildirib. O, Pakistanda həyata keçirilən humanitar layihələrə görə Mehriban Əliyevanın 2012-ci ildə “Humanizm rəmzi - 2012-ci ilin qadını”, 2013-cü ildə “Şəhid Bənazir Bhutto” mükafatları, 2015-ci ildə isə “Hilal-e Pakistan” ali ordeni ilə təltif olunduğunu qeyd edib.

KİV nümayəndələrinə müsahibə verən səfir Daşqın Şikarov Azərbaycan-Pakistan dostluğu, Prezident İlham Əliyevin rəhbərliyi ilə ölkəmizdə həyata keçirilən uğurlu xarici siyasət, Heydər Əliyev Fondunun fəaliyyəti haqqında ətraflı məlumat verib. Fondun təşəbbüsü və dəstəyi ilə keçirilən belə humanitar tədbirlərin xalqlarımız arasında mövcud olan qardaşlıq münasibətlərinin daha da dərinləşməsinə təkan verdiyi bildirilib. Ermənistan-Azərbaycan, Dağlıq Qarabağ münaqişəsinin həlli prosesində Pakistanın daim Azərbaycanın yanında olduğu qeyd edilib. Səfir Ermənistan tərəfindən tarixi Azərbaycan torpaqlarının işğalı, həmçinin xalqımıza qarşı törədilən soyqırımı faktına görə Pakistanın Ermənistanı dövlət kimi tanımamasını yüksək qiymətləndirərək Pakistan dövlətinə və xalqına dərin təşəkkürünü bildirib.